Loading...
You are here:  Home  >  खेलकुद  >  Current Article

आहा रारा गोल्डकपः संकटालाई हराउँदै त्रिभुवन आर्मी सेमिफाइनलमा

२७ फागुन,   रासस,   at 9:44 PM

By   /  March 10, 2020  /  Comments Off on आहा रारा गोल्डकपः संकटालाई हराउँदै त्रिभुवन आर्मी सेमिफाइनलमा

    Print       Email

पोखरा । नेपाली सेनाको त्रिभुवन आर्मी क्लब सङ्कटा क्लबलाई ३–० गोलअन्तरले पराजित गर्दै पोखरामा जारी १८ औँ संस्करणको आहा रारा गोल्डकप फुटबल प्रतियोगिताको सेमिफाइनलमा प्रवेश गरेको छ।

पोखरा रङ्गशालामा मंगलबार भएकाे प्रतियोगिताको अन्तिम क्वाटरफाइनलको खेलमा विभागीय टोली आर्मीले खेलको पहिलो हाफमा एक र दोस्रो हाफमा दुई गोल गरी ३–० ले सङ्कटालाई निराश बनाएको हो।

खेलको १५औँ मिनेटमा नवयुग श्रेष्ठको क्रस पासलाई सदुपयोग गर्दै सुदील राईले आर्मीलाई खेलमा अग्रता दिलाए। राईले पेनाल्टी एरियाबाट हानेको प्रहार सङ्कटाका गोलकिपर राजा बाबु थापाको खुट्टामा लाग्दै बल पोष्टभित्र छिरेको थियो।

खेलको ७१औँ मिनेटमा सन्तोष तामाङले मैदानको दायाँ साइडबाट प्रहार गरेको कर्नर किकलाई विकास तामाङले हेड गरेको केही क्षण हुलमुलको अवस्थामा खेलको ‘म्यान अफ दी म्याच’ समेत घोषित आर्मीका नवयुग श्रेष्ठले बललाई पोष्टको दिशा दिँदै टोलीको अग्रता दोब्बर पारे।

खेलको ६८ औँ मिनेटमा सुदील राइको स्थानमा मैदान प्रवेश गरेका विवेक बस्नेतले दोस्रो गोल भएको चार मिनेटपछि गोल गर्न सफल भए। मैदानको बायाँ साइडबाट सेसेहाङ आङ्देम्बाले दिएको लामो पासलाई दायाँ साइडबाट एक्लै अघि बढाउँदै पेनाल्टी क्षेत्रबाट बस्नेतको कडा प्रहार सिधैँ गोलमा परिणत भएको हो।

पहिलो हाफमा आर्मीलाई दबाबमा राखेको सङ्कटाले केही गोल गर्ने मौका प्राप्त गरेपनि सदुपयोग गर्न सकेन। दोस्रो हाफमा भने आर्मीले छरितो खेल पस्कदै लगातार विपक्षीको पोष्टमा आक्रमण बुनेको थियो। आर्मीले अब फागुन २९ गते मनाङ मर्स्याङदी क्लबसँग फाइनल प्रवेशका लागि प्रतिस्पर्धा गर्नेछ।

आहा रारामा हालसम्म १४ पटक प्रतियोगितामा सहभागिता जनाएको आर्मीले हालसम्म उपाधि जित्न सकेको छैन। आर्मी प्रतियोगिताको सातौँ, आठौँ, १४ औँ र १७ औँ संस्करणमा फाइनल पुगे पनि उपाधि जित्न सकेको छैन। सङ्कटाले हालसम्म चार पटक प्रतियोगितामा सहभागिता जनाएकामा सेमिफाइनलभन्दा माथि जान सकेको थिएन।

खेलपछिको पत्रकार सम्मेलनमा आर्मी क्लबका प्रशिक्षक नवीन न्यौपानेले महत्वपूर्ण खेलाडीहरु राष्ट्रिय टोलीको प्रशिक्षणपछि पहिलोपटक सहभागिता जनाएकाले सेट पिसमा अभ्यास गर्न नपाउँदा पहिलो हाफमा दवाव महसुस भएको बताए। उनले दोस्रो हाफमा लय मिलेको र खेल राम्रो भएको बताए। पहिलो हाफमा मिडफिल्डमा बढी ‘मिस पास’ भएको उनको भनाइ थियो।

दोस्रो हाफको जस्तै प्रदर्शन सेमिफाइनलमा दोहोर्‍याउँदै फाइनल प्रवेश गरेर उपाधि जित्ने टोलीको लक्ष्य रहेको प्रशिक्षक न्यौपानले उल्लेख गरे। ‘शहीद स्मारक लिगमा उपाधि जितेर इतिहास रच्ने अवसर गुमाएका छौँ। अब आहा राराको उपाधि जित्दै विसं २०७६ को बिदाइ गर्न चाहन्छौँ।’ प्रशिक्षक न्यौपानेले भने।

सङ्कटाका प्रशिक्षक सल्यान खड्गीले शुरुवाति १५ मिनेटमा प्राप्त अवसरलाई सदुपयोग गर्न नसक्नु नै टोलीको पराजयको कारण रहेको बताउँदै दोस्रो हाफमा खेलाडी परिर्वतन गरेर आक्रामक खेल प्रस्तुत गरेपनि सफल नभएको बताए।

प्रतियोगिताको पहिलो सेमिफाइनल खेलमा बुधबार थ्रीस्टार क्लब र नेपाल पुलिस क्लबका बीचमा फाइनल प्रवेशका लागि प्रतिस्पर्धा हुने प्रतियोगिता आयोजक सहारा क्लबले जनाएको छ ।

प्रतिक्रिया व्यक्त गर्नुस्
    Print       Email

You might also like...

अर्जेन्टिनाका लेजेण्ड फुटबलर डिएगो म्याराडोनाको निधन

Read More →