Loading...
You are here:  Home  >  अर्थतन्त्र  >  Current Article

सौर्य एयरलाइन्सले तिर्यो बक्यौता : फागुन २४ देखि उडान

२१ फागुन,   रासस,   at 10:30 PM

By   /  March 5, 2019  /  Comments Off on सौर्य एयरलाइन्सले तिर्यो बक्यौता : फागुन २४ देखि उडान

    Print       Email

काठमाडौँ : निजी क्षेत्रको वायु सेवा प्रदायक कम्पनी सौर्य एयरलाइन्सले यही फागुन २४ गतेदेखि आफ्नो सेवा पुनः सञ्चालन गर्ने भएको छ । त्रिभुवन अन्तर्राष्ट्रिय विमानस्थललाई तिर्नुपर्ने विमानस्थल सेवा शुल्कबापतको बक्यौता रकम तिर्न अटेर गरेपछि विमानस्थलले उक्त एयरलाइन्सको उडान रोकेको थियो ।

करिब चार महीनादेखि उडान रोकिएको सो एयरलाइन्सले नियमित उडान गर्ने भएको हो । भारतीय कम्पनी कुबेर समूहले खरीद गरेको सौर्यले आज पहिलो किस्ताबापत रु ५० लाख तिरेको विमानस्थल कार्यालयले जनाएको छ ।

विमानस्थलका महाप्रबन्धक राजकुमार क्षेत्रीका अनुसार सो कम्पनीले विमानस्थलाई जरिवानासहित रु चार करोड बक्यौता रकम तिर्नुपर्ने हुन्छ । अबका १० दिनभित्र थप रु ५० लाख र दुई महीनाभित्र सबै बक्यौता तिर्ने एयरलाइन्सले वचन दिएको महाप्रबन्धक क्षेत्रीले बताउनुभयो ।

सौर्य एयरलाइन्सका बजार व्यस्थापन प्रमुख मुकेश खनालले बक्यौता बुझाउँदै सेवा सञ्चालन गरिने जानकारी दिनुभयो । अबको एक महीनाभित्र सबै बक्यौता रकम तिरिसक्ने उहाँले उल्लेख गर्नुभयो ।

विमानस्थलले सेवा शुल्क नतिरेको भन्दै गत मङ्सिर ११ गतेदेखि सौर्यका जहाज ग्राउण्डेड गरेको थियो । आर्थिक सङ्कटमा परेको सौर्य केही साताअघि मात्र भारतीय लगानीकर्ता कुबेर समूहले रु ६३ करोडमा खरीद गरेको थियो । सो समूहले ४९ प्रतिशत भारतीय तथा ५१ प्रतिशत नेपालीका नाममा खरीद गरेको जनाएको छ ।

हाल दुई ओटा बम्बार्डिएर जहाजमार्फत उडान गर्दै आएको सौर्यले अबका ६ महीनाभित्र तीन ओटा एटिआर जहाज भित्र्याउने तयारी गरेको बजार व्यवस्थापक प्रमुख खनालले जानकारी दिनुभयो । कम्पनीले नयाँ जहाज खरीद गरेसँगै नयाँ गन्तव्यमा उडान गर्ने योजना बनाएको छ । हाल विराटनगर, भैरहवा, भद्रपुर, नेपालगञ्ज तथा धनगढीका लागि उडान गर्दै आएको सौर्यले नयाँ जहाजबाट पोखरा, सिमरा, भरतपुर, जनकपुर तथा राजविराजका लागि उडान गर्ने योजना रहेको जनाएको छ ।

प्रतिक्रिया व्यक्त गर्नुस्
    Print       Email

You might also like...

उर्जामन्त्री पुनले गरे माथिल्लो तामाकोशी निरिक्षण , मंसिरभित्र आयोजना सम्पन्न हुने

Read More →