Loading...
You are here:  Home  >  खेलकुद  >  Current Article

साफ च्याम्पियनसिप महिला फुटबल प्रतियोगितामा भारत फेरि बाधक, नेपाल उपविजेता

८ चैत,   खबरमञ्च,   at 6:17 PM

By   /  March 22, 2019  /  Comments Off on साफ च्याम्पियनसिप महिला फुटबल प्रतियोगितामा भारत फेरि बाधक, नेपाल उपविजेता

    Print       Email

विराटनगर । साफ च्याम्पियनसिप महिला फुटबल प्रतियोगितामा नेपाल फेरि पनि उपविजेतामै सीमित भएको छ ।

शुक्रबार विराटनगरको सहिद रंगशालामा भएको पाँचौं संस्करणको फाइनलमा नेपाल फेरि भारतसित पराजित भयो ।

नेपाल ३–१ ले पराजित भएको हो । मध्यान्तरसम्म १–१ गोलको बराबरी खेलेको नेपालले मध्यान्तरपछि २ गोल खाएको हो ।

२६औं मिनेटमा पहिलो गोल खाएको नेपालले त्यसको सात मिनेटमा सावित्रा भण्डारीको गोलमार्फत् बराबरी गर्न सफल भएको थियो ।

खेलको ६३औं मिनेटमा गोल खाएर २–१ ले पछि परेको नेपालले ७८औं मिनेटमा तेस्रो गोल खाएपछि खेलमा फर्कन सकेन । डालिमा छिपर, ग्रेस डाङ्मयी र अन्जु तामाङले भारतलाई गोल दिलाए ।

सावित्राले अन्तर्राष्ट्रिय गोल संख्यालाई २६ पुर्‍याउँदै पूर्वकप्तान जमुना गुरुङको २५ गोलको रेकर्ड तोडेर नेपालका तर्फबाट सर्वाधिक गोल गर्ने दोस्रो खेलाडी बनेकी छन् । पूर्वकप्तान अनु लामाको नाममा ३५ गोलको कीर्तिमान छ ।

सावित्रासँगै प्रतियोगितामा ४ गोल गरेकी भारतीय खेलाडी इन्दुमति संयुक्तरुपमा सर्वाधिक गोलकर्ता भए ।

प्रतियोगिताको सर्वोत्कृष्ट खेलाडी भारतकी डालिमा छिपर घोषित भइन् ।

फाइनल पुग्दासम्म १० गोल गर्दा एक गोल नखाएको नेपालले फाइनलमा ३ गोल खायो ।

समूह चरणमा भुटान र बंगलादेशलाई समान ३–० ले हराएको नेपालले सेमिफाइनलमा श्रीलंकालाई ४–० ले हराएको थियो ।

नेपाल चौथोपटक फाइनलमा भारतसित पराजित भएको हो । गत संस्करणमा भने नेपाल भारतसित सेमिफाइनलमै पराजित भएको थियो ।

साफ च्याम्पियनसिपमा नेपालले अहिलेसम्म भारतलाई हराउन सकेको छैन ।

महिला फुटबलमा अहिलेसम्म नेपालले भारतसँग ११ खेल खेलेकामा एक खेल जित्दा दुई बराबरी गरेको छ भने ८ खेल हारेको छ ।

प्रतिक्रिया व्यक्त गर्नुस्
    Print       Email

You might also like...

विश्वकप क्रिकेटः अष्ट्रेलियालाई हराउँदै इंग्ल्यान्ड फाइनलमा, उपाधिका लागि न्युजिल्यान्डसंग भेट

Read More →