Loading...
You are here:  Home  >  शिक्षा  >  Current Article

सरकार र डाक्टर केसीबीच भएको सम्झौतामाथि शंका नगर्न मन्त्री पोखरेलको आग्रह

९ मंसिर,   खबरमञ्च,   at 5:15 PM

By   /  November 25, 2018  /  Comments Off on सरकार र डाक्टर केसीबीच भएको सम्झौतामाथि शंका नगर्न मन्त्री पोखरेलको आग्रह

    Print       Email

काठमाडाैं । शिक्षा, विज्ञान तथा प्रविधिमन्त्री गिरिराजमणि पोखरेलले सरकार र डाक्टर गोविन्द केसीबीच पछिल्लो पटक सम्पन्न सम्झौता सकारात्मक रूपमा अघि बढ्ने बताएका छन्।

सिंहदरबारमा संघीय संसद्अन्तर्गतको शिक्षा तथा स्वास्थ्य उपसमितिका संयोजक भैरवबहादुर विष्टको संयोजकत्वमा बसेको बैठकमा अधिकांश सांसदले सरकार र डाक्टर केसीबीचको सम्झौता अक्षरशः लागू हुने या नहुने भन्ने विषयमा सम्बन्धित मन्त्रीको ध्यानार्कषण गरेपछि बैठकमा मन्त्री पाखरेलले सो कुरा बताएका हुन्।

राष्ट्रिय चिकित्सा शिक्षा विधेयक, २०७५ का सम्बन्धमा छलफल गर्न गठित उपसमितिको आजको बैठकलाई सम्बोधन गर्दै मन्त्री पोखरेलले डाक्टर केसीसँगको सम्झौता कार्यान्वयन हुन्न भन्ने नकारात्मक हल्लाको पछाडि नलाग्न सांसदहरूलाई आग्रह गरे।

सरकार र डा. केसीबीच पछिल्लोपटक साउन १० गते प्रधानमन्त्री केपी शर्मा ओलीको उपस्थितिबीच बालुवाटारमा नौं बुँदे सम्झौता भएको थियो। समझदारीअनुसार १० वर्षसम्म काठमाडौंमा नयाँ मेडिकल कलेज स्थापना गर्न नपाइने, सङ्घीय संसद्मा पेस भएको राष्ट्रिय चिकित्सा शिक्षा विधेयक, २०७५ अक्षरशः लागू गर्नुपर्ने भन्ने विषयमा सम्झौता भएको हो।

राष्ट्रिय चिकित्सा विधेयक २०७५ का सम्बन्धमा अहिले सम्बन्धित समिति तथा उपसमितिमा दफाबार छलफल भइरहेको छ। आज विधेयकको दफा १६ सम्मको छलफल सम्पन्न भएको छ।

आजको बैठकमा सांसद दिलेन्द्रप्रसाद बडू, कृष्णप्रसाद दाहाल, देवप्रसाद गुरुङ, गङ्गा चौधरी, दिलबहादुर महत, रेखा शर्मा, रामबहादुर विष्ट, मैनाकुमारी भण्डारी, यशोदा गुरुङ सुवेदी, पुष्पाकुमारी कर्ण, रेखा झा, प्रेम सुवालले दफावार छलफलमा भाग लिएका थिए। उपसमितिको अर्को बैठक (भोलि) सोमबार ११ बजे सिंहदरबारमा बस्ने भएको छ।

प्रतिक्रिया व्यक्त गर्नुस्
    Print       Email

You might also like...

संसदीय समितिद्वारा केन्द्रीय पुस्तकालय अनुगमन

Read More →